हेटौडा । हेटौंडा उपमहानगरपालिका–५ क्षेत्रमा अव्यवस्थित रूपमा बसोबास गर्दै आएका घरटहरा हटाउने क्रममा शुक्रबार डोजर प्रयोग गरिएको छ ।
सार्वजनिक जग्गा अतिक्रमण गरी निर्माण गरिएका संरचना हटाउने अभियानअन्तर्गत उपमहानगरपालिकाले उक्त कदम चालेको जनाएको छ ।
उपमहानगरपालिकाका अनुसार लामो समयदेखि सूचना जारी गरिँदै आएको र स्वेच्छाले संरचना हटाउन आग्रह गरिएको भएपनि अटेर भएपछि डोजर प्रयोग गर्न बाध्य भएको हो ।
नगर प्रशासनले सडक विस्तार, नाला व्यवस्थापन तथा सार्वजनिक उपयोगका लागि आवश्यक जग्गा खाली गराउने उद्देश्यले अभियान सञ्चालन गरिएको स्पष्ट पारेको छ ।
बिहानैदेखि सुरु गरिएको उक्त कार्यमा नगरप्रहरी, नेपाल प्रहरी तथा प्राविधिक टोलीको सहभागिता रहेको थियो । डोजर परिचालनसँगै दर्जनौँ अस्थायी तथा केही पक्की संरचनाहरू हटाइएको जनाइएको छ ।
यद्यपि, प्रभावित स्थानीयवासीले भने पर्याप्त समय र वैकल्पिक बसोबासको व्यवस्था नगरी जबर्जस्ती हटाइएको गुनासो गरेका छन् । केहीले आफूहरू वर्षौंदेखि बसोबास गर्दै आएको दाबी गर्दै अचानक डोजर चलाउँदा जीवनयापन संकटमा परेको बताएका छन् ।
स्थानीय प्रशासनले भने कानुनी प्रक्रिया पूरा गरी नै अतिक्रमण हटाइएको दाबी गर्दै प्रभावित परिवारको तथ्याङ्क संकलन भइरहेको र आवश्यक समन्वयका लागि सम्बन्धित निकायसँग छलफल गरिने जनाएको छ ।
