काठमाडौं । गायिका एलिना चौहानले सञ्चालनमा ल्याएको पहिरन तथा श्रृंगारसम्बन्धी आउटलेट ‘रमणी बाइ एलिना’ सञ्चालनमा आएको केही समयमै नयाँ ठाउँमा सार्नुपर्ने भएको छ ।
एलिनाले गत साउनको पहिलो साता मध्य बानेश्वरमा करिब २ करोड रुपैयाँ लगानीमा ‘रमणी बाइ एलिना’ सुरु गरेकी थिइन् । सञ्चालनमा आएको केही समयमै व्यवसायले गति लिन थाले पनि घरसम्बन्धी विवादका कारण उनले आउटलेट स्थानान्तरण गर्नुपरेको हो ।
उक्त भवन खाली गर्न सहकारीले ३५ दिने सूचना टाँसेपछि एलिनाले नजिकैको अर्को घरमा सामान सार्न थालेकी छन् । भवन विवादित रहेको र खाली गर्न सूचना जारी भएपछि आफू समस्यामा परेको एलिनाले बताएकी छन् ।
एलिनाका अनुसार आउटलेट उद्घाटन भएको तीन दिनपछि नै घरबेटीले ठाउँ खाली गर्न भनेका थिए । तर, त्यतिबेला उनले उक्त विषय सार्वजनिक गरेकी थिइनन् ।
‘रमणी’ आफ्नो सपना भएकाले आएको समस्याबाट पछि नहट्ने बताउँदै एलिनाले नयाँ स्थानमा व्यवसायलाई निरन्तरता दिने बताएकी छन् । नयाँ ठाउँमा आउटलेट सार्दा थप ४० देखि ५० लाख रुपैयाँसम्म खर्च हुने उनको भनाइ छ ।
‘रमणी’लाई आफ्नो मेहनत र सपनासँग जोड्दै एलिनाले आफू यो समस्याबाट नढल्ने र फेरि उठेर व्यवसायलाई निरन्तरता दिने बताएकी छन् ।
