काठमाडौं । प्रेस चौतारी नेपालले गोरखापत्र संस्थानद्वारा गरिएको प्रदेश संयोजक परिवर्तनको निर्णयप्रति आपत्ति जनाएको छ । जारी गरेको प्रेस विज्ञप्तिमा संस्थानले माघ २२ गतेदेखि लागू हुने गरी मधेश र वागमती प्रदेश संयोजक परिवर्तन गरेको निर्णयप्रति गम्भीर ध्यानाकर्षण भएको उल्लेख गरिएको छ ।
विज्ञप्तिअनुसार प्रतिनिधिसभा सदस्य निर्वाचन–२०८२ को आचारसंहिता लागू भइरहेको संवेदनशील समयमा इमान्दारीपूर्वक जिम्मेवारी निर्वाह गर्दै आएका मधेश प्रदेश संयोजक धर्मेन्द्र झा र वागमती प्रदेश संयोजक शालिग्राम नेपाललाई हटाई नयाँ संयोजक नियुक्त गर्ने निर्णय निर्वाचन आचारसंहिताको मर्म विपरीत रहेको ठहर गरिएको छ ।
संस्थाले उक्त निर्णय श्रमजीवी पत्रकारहरूको अधिकार र निर्वाचन आचारसंहिताको भावना विपरीत भएको भन्दै आपत्ति जनाएको छ । साथै जिल्ला स्ट्रिन्जरहरूको पारिश्रमिक नियमित रूपमा भुक्तानी नभएको विषयप्रति पनि ध्यानाकर्षण गराएको छ ।
विज्ञप्तिमा गोरखापत्र संस्थान कर्मचारी सेवा शर्त विनियमावली–२०८२ बमोजिम करार सेवामा कार्यरत स्ट्रिन्जर तथा कर्मचारीहरूको कार्यविधि निर्माण भए पनि कार्यान्वयनमा ढिलाइ भएको उल्लेख छ । यसअघि कार्यविधि तयार पार्न समिति गठन गरिए पनि हालसम्म सम्बन्धित मन्त्रालयबाट पारित भई कार्यान्वयनमा नआउँदा करार सेवामा कार्यरत पत्रकार तथा कर्मचारीहरूमा रोजगारीको अन्योल र असुरक्षा उत्पन्न भएको जनाइएको छ ।
प्रेस चौतारी नेपालले प्रदेश संयोजक परिवर्तनसम्बन्धी निर्णय अविलम्ब सच्याउन र करार सेवासम्बन्धी कार्यविधि यथाशीघ्र पारित गरी कार्यान्वयनमा ल्याउन माग गरेको छ । जायज माग सम्बोधन नभए चरणबद्ध आन्दोलनका कार्यक्रम सार्वजनिक गर्न बाध्य हुने चेतावनी पनि विज्ञप्तिमा दिइएको छ।
