दमक । नेकपा एमालेका अध्यक्ष केपी शर्मा ओलीले आज झापाको दमकमा विद्यार्थीहरूसँग छलफल गर्ने भएका छन् । आज बिहान ११ बजे दमकस्थित होटेल कोरोनेशनमा यस क्षेत्रका विभिन्न कलेज तथा विद्यालयका करिब ३ सयभन्दा बढी विद्यार्थीसँग अन्तरक्रिया गर्ने कार्यक्रम तय भएको छ ।
निर्वाचन लक्षित भेटघाटको क्रममा आजको पहिलो कार्यक्रम विद्यार्थीहरूसँग छलफल रहने जनाइएको छ । झापा–५ नेपाल कम्युनिष्ट पार्टी (एमाले) निर्वाचन प्रचार उपसमितिका संयोजक इन्द्र भण्डारीका अनुसार कार्यक्रममा विद्यार्थीका समसामयिक समस्या, जिज्ञासा र सुझावहरू सुन्ने तथा उठेका विषयमा अध्यक्ष ओलीले प्रत्यक्ष अन्तरक्रिया गर्ने कार्यक्रम रहेको छ । विद्यार्थीसँगको छलफलपछि अध्यक्ष ओली दिनभरि झापाको गौरीगञ्ज नगरपालिकाअन्तर्गत विभिन्न स्थानमा मतदातासँग भेटघाटमा सहभागी हुनेछन् ।
घोषित कार्यक्रमअनुसार उनी दिउँसो साढे १ बजे गौरीगञ्ज–४ को खाङ्टामा पुगेर स्थानीयसँग भेटघाट गर्नेछन् । त्यसपछि सोही वडाको मियाँ टोलमा स्थानीयसँग संवाद गर्ने कार्यक्रम रहेको छ । मियाँ टोलको कार्यक्रमपछि उनी दिउँसो ३ बजे दुर्गाचौक मजुवामा मतदातासँग छलफल गर्ने र साढे ३ बजे फकिरढिपमा भेटघाट गर्ने कार्यतालिका रहेको छ ।
समूहगत रूपमा आयोजना गरिएका भेटघाट कार्यक्रममा स्थानीय बासिन्दाका समस्या र गुनासो सुन्ने तथा समाधानका विषयमा आफ्नो धारणा राख्ने कार्यक्रम रहेको जनाइएको छ । अध्यक्ष ओली पछिल्लो समय आफ्नो निर्वाचन क्षेत्रका टोल–टोलमा पुगेर जनताका कुरा प्रत्यक्ष सुन्ने अभियानमा सक्रिय रहेका छन् ।
