काठमाडौं । तीजको अवसर पारेर भदौ २६ गतेदेखि प्रदर्शनमा आउन लागेको फिल्म ‘अक्षरा’की अभिनेत्री न्यान्सी खड्का बाढी प्रभावितको सहयोगमा जुटेकी छन् । उनले मंगलबार नुवाकोट पुगेर भोटेकोशी बाढीबाट प्रभावित तथा घरबारविहीन परिवारलाई राहत सामग्री वितरण गरेकी हुन् ।
न्यान्सीले प्रभावित परिवारलाई खाद्यान्न, लत्ताकपडा र फलफूल उपलब्ध गराएकी थिइन् । राहत वितरणपछि उनले नुवाकोटको पिपलटारस्थित आयुर्वेदिक अस्पताल पुगेर बाढीका कारण प्रभावित भएका तथा उद्धार गरिएका व्यक्तिहरूसँग भेट गरेकी थिइन् ।
पिपलटारका वडा अध्यक्षसँग भेटेर उनले बाढी प्रभावित क्षेत्रको अवस्था र तत्काल आवश्यक पर्ने सहयोगबारे जानकारी लिइन् । त्यस क्रममा उद्धार तथा राहत कार्यमा खटिएका सुरक्षाकर्मीलाई आवश्यक पर्ने मास्क र ग्लोभ्ससमेत हस्तान्तरण गरिन् ।
पूर्वमिस नेपाल इन्टरनेसनलसमेत रहेकी न्यान्सीले आफ्नो सहयोग ठूलो नभए पनि विपद्को समयमा प्रभावित परिवारको साथमा पुग्न पाउँदा खुसी लागेको बताइन् । उनले कठिन अवस्थामा पीडितको कुरा सुन्ने र आफ्नो क्षमताअनुसार सहयोग गर्ने उद्देश्यले आफू प्रभावित क्षेत्रमा पुगेको बताइन् ।
भोटेकोशी बाढीले निम्त्याएको विपद्का कारण न्यान्सीले प्रदर्शनको तयारीमा रहेको फिल्म ‘अक्षरा’को प्रचारलाई समेत अघि बढाउन सकेकी छैनन् । फिल्मबाट भने उनले ठूलो अपेक्षा राखेकी छन् ।
‘१२ गाउँ’ प्रदर्शनमा आएको करिब दुई वर्षपछि पर्दामा फर्किन लागेकी न्यान्सीले ‘अक्षरा’मा विवाहित महिलाको भूमिका निर्वाह गरेकी छन् । फिल्ममा उनको जोडी अभिनेता सुशील सिटौलासँग बाँधिएको छ ।
विनयराज पौडेलको निर्देशनमा बनेको फिल्ममा न्यान्सी र सुशीलसँगै सुशील पोखरेल, उत्तम केसी, अंशु महर्जन, पुष्कर राउत, रिस्ता अधिकारी, गीता अधिकारी र सिर्जना अधिकारीलगायत कलाकारको अभिनय छ ।
सोनी थापा प्रस्तुतकर्ता रहेको फिल्मका निर्माता उग्रसेन ढुङ्गाना र सुग्रसेन ढुङ्गाना हुन् भने छायांकन दिपेन बस्न्यातले गरेका छन् । फिल्म भदौ २६ गतेदेखि प्रदर्शनमा आउने तयारीमा छ ।
