काठमाडौं । कुमार गजुरेलको निर्देशनमा बनेको नेपाली फिल्म ‘सारथी’ आगामी मंसिर ११ गते अर्थात् २७ नोभेम्बरदेखि प्रदर्शनमा आउने भएको छ । निर्माण पक्षले शुक्रबार फिल्मको फर्स्टलुक पोस्टर सार्वजनिक गर्दै प्रदर्शन मिति घोषणा गरेको हो ।
सार्वजनिक पोस्टरमा अभिनेत्री निरुता सिंह काखमा बच्चा लिएर सुमसुमाइरहेको देखिन्छिन् । पोस्टरले फिल्ममा निरुता आमाको भूमिकामा रहेको संकेत गर्छ । पहाडी भूगोललाई पृष्ठभूमिमा राखिएको पोस्टरमा उनले गम्छाले टाउको बाँधेकी छन् भने रातो फरिया लगाएकी छन् । उनको अनुहारमा पीडाको भाव देखिन्छ र खुट्टाका औंलाबाट रगत बगेको दृश्यले पात्रको संघर्षपूर्ण जीवनलाई संकेत गरेको छ ।
निरुताले सामाजिक सञ्जालमार्फत पोस्टर सार्वजनिक गर्दै ‘सारथी’लाई आफ्नो करिअरको नयाँ अध्यायका रूपमा उल्लेख गरेकी छन् ।
किम्भे प्रोडक्सन र धिरज फिल्म इन्फिनिटीको ब्यानरमा निर्माण भएको फिल्ममा निरुता सिंहसँगै उत्तम प्रधान, मुकुन्द श्रेष्ठ, राजेन्द्र केसी, सम्रान्त थापा, गिरी विश्वकर्मा, गायत्री जोशी, कल्पना थापा, मदन थापा, सन्तोष ढकाल र आशा विश्वकर्मालगायत कलाकारको अभिनय रहेको छ ।
‘दर्पण छायाँ’को चर्चित जोडी निरुता सिंह र उत्तम प्रधानले करिब दुई दशकपछि ‘सारथी’मार्फत पुनः सहकार्य गरेका हुन् ।
सम्पादकको रूपमा परिचित तारा थापा ‘किम्भे’ प्रस्तुतकर्ता रहेको फिल्मका निर्माता रदीप श्रेष्ठ र प्रदीप रायमाझी हुन् । बेक बहादुर विश्वकर्मा र नवीन श्रेष्ठ कार्यकारी निर्माता तथा अमीर केसी लाइन प्रोड्युसर छन् ।
फिल्मको छायांकन संकल्प भुजेलले गरेका हुन् भने बाबुल गिरी र प्रशान्त सिवाकोटीले गीतमा संगीत दिएका छन् । फिल्मले संघर्ष र पीडाबीचको पारिवारिक कथालाई प्रस्तुत गर्ने निर्माण पक्षले जनाएको छ ।
‘सारथी’ मंसिर ११ गतेदेखि देशभरका हलमा प्रदर्शनमा आउनेछ ।
