काठमाडौँ । आगामी जेठ ८ गते अर्थात् भोलि शुक्रबारदेखि प्रदर्शनमा आउन लागेको नेपाली फिल्म ‘काजी’ को अग्रिम टिकट बुकिङ तथा बिक्री खुला गरिएसँगै दर्शकको आकर्षण बढेको निर्माण पक्षले दाबी गरेको छ ।
फिल्मको ट्रेलर र गीत सार्वजनिक भएसँगै दर्शकमाझ यसको बढ्दो उत्साहलाई ध्यानमा राखेर देशभरका मल्टिप्लेक्सले फिल्मलाई शो उपलब्ध गराएका छन्, जहाँ दर्शकको चासो र आकर्षण बढेको पाइएको छ ।
फिल्म शो खुल्ने बितिकै दर्शकले आफ्नो टिकट बुकिङ तथा खरिद गरिरहेका छन् । अनलाइन एप र फिल्म प्रदर्शकको वेब साइटमा ‘काजी’लाई लिएर दर्शक उत्साहित देखिएका छन् । प्रदर्शकले उपलब्ध गराएको शोमा दर्शकको चाप बढिरहेको निर्माण पक्षको दाबी छ । दर्शकको यो आकर्षणले शुक्रबार फिल्मले धमाकेदार सुरुआत गर्ने वितरकको विश्वास छ । निर्माता रामप्रसाद रिजालका अनुसार ‘काजी’ लाई लिएर दर्शकले देखाउनुभएको आकर्षणले टिम उत्साहित छ ।
‘हामीले इमान्दार भएर एउटा उत्कृष्ट फिल्म दर्शक माँझ ल्याएका छौँ, हामीले कुनै कुमार कन्जुस्याइँ नगरेर फिल्म तयार गरेका छौँ । शुक्रबारदेखि सार्वजनिक प्रदर्शन हुने फिल्म हेरेपछि दर्शकले प्रेम, समर्पण र भावनात्मक सम्बन्धको अर्थलाई काजी र कजिनीमार्फत महसुस गर्नुहुनेछ । हामी सम्पूर्ण टिम दर्शक प्रतिक्रिया लिन निकै उत्साहित छौँ’ निर्माता रिजालले भने ।
उक्त फिल्मको कथा, पात्र र अभिनयका कारण अभिनेता विपिन कार्की चर्चामा छन् । उनका अनुसार ‘काजी’ आफूले यसअघि नगरेको फरक शैलीको प्रेमकथामा आधारित फिल्म हो । आफ्नै फिल्मको खासै प्रचार नगर्ने विपिन यसपटक भने ‘काजी’लाई लिएर विश्वस्त छन् ।
‘काजी मैले ढुक्कले हेर्नुस् भन्नसक्ने फिल्म बनेको छ । यसमा देखाइएको प्रेम र समर्पणले दर्शकलाई हलबाट निस्किदै गर्दा केही दिएर नै पठाउँछ । मैले अहिले निर्धक्क भएर बोलिरहेका शब्दलाई दर्शकले फिल्म हेरेर निस्किदै गर्दा महसुस गर्नुहुनेछ’,अभिनेता कार्कीले भने ।
अभिनेता कार्कीका अनुसार ‘फिल्म इनिसियलसँगै दर्शककै सिफारिसमा आक्रमक हुनेछ । ‘काजी हेरेर निस्किएका दर्शकले अन्यलाई सिफारिस गरेर फिल्म हेर्न पठाउनुहुनेछ, म ढुक्क छु’, अभिनेता कार्कीले भने ।
फिल्मलाई लक्ष्मण रिजालले निर्देशन गरेका छन् । श्रीमान–श्रीमतीबीचको समझदारी, त्याग र सँगै खुसी भएर बाँच्ने भावनालाई फिल्मको केन्द्रमा राखिएको छ ।फिल्ममा विपिनसँगै केकी अधिकारी, गरिमा शर्मा, प्रकाश घिमिरे, हेमन्त बुढाथोकी, विशाल पहारी, विनोद न्यौपाने, रश्मी भट्ट र हिउँवाला गौतमलगायत कलाकारहरूको अभिनय रहेको छ । प्रदीप भारद्वाजको कथा रहेको फिल्मलाई रामप्रसाद रिजालले प्रस्तुत गरेका हुन् ।
रिजाल एण्ड रिजाल प्रोडक्सनको ब्यानरमा निर्माण भएको फिल्ममा नेहान रिजाल र विकाशराज जोशी निर्माता रहेका छन् । चिन्तन राजभण्डारीको छायांकन, कालीप्रसाद बास्कोटाको संगीत र विपीन मल्लको सम्पादन रहेको फिल्म ‘काजी’लाई श्रीराम बालाजी फिल्म्सले वितरण गर्ने जिम्मेवारी लिएको छ ।
