काठमाडौं – २० वर्षदेखि यौनकर्मीसँग प्रत्यक्ष जोडिएर काम गरे पश्चात फिल्म ‘लालिमा’ बनेको निर्माण पक्षले दाबी गरेको छ । हात्तिसारमा आयोजिक पत्रकार भेटघाट कार्यक्रममा लेखक तथा निर्देशक रोसन मिराजले यौनकर्मीहरूको अवस्था गहनरुपले डकुमेन्ट्रीमा देखाउन सम्भव नभएपछि फिल्म बनाउने निर्णय लिएको बताए ।
उनले भने, ‘हामी पछिल्लो २० वर्षदेखि यौनकर्मीहरूसँग जोडिएर काम गरिरहेका छौं । डकुमेन्ट्री बनाउन खोज्दा परिचय खुल्ने डरले यौनकर्मी पर्दामा देखिन चाहनुभएन । यो कथा कुनै न कुनै रुपमा दर्शकसम्म पुग्नुपर्छ भन्ने लागेर फिचर शैलीमा निर्माण गरेका हौँ ।’ उनले डकुमेन्ट्रीका लागि सयौँ यौनकर्मीसँग कुराकानी गरेको र उनीहरुकाे प्रतिनिधि अनुभव समेटेर चलचित्र निर्माण गरेको जानकारी गराए । तर चलचित्र बनाउँदा शेाषणभन्दा पनि मानवअधिकारको पक्षलाई प्राथमिकता दिएको उनले बताए ।
चलचित्रमा रोशनी कार्कीले शीर्ष भूमिका निर्वाह गरेकी छिन् । राेशनीले चलचित्रको प्रस्ताव आउँदा सक्छु र ? जस्तो लागे पनि कथा र निर्देशकको आत्मविश्वासले विश्वस्त बनाएको बताइन् । 'सुटिङअघि केही यौनकर्मीसँग कुरा गर्ने अवसर पाएकी थिएँ । यसले चरित्रलाई आत्मसात गर्न सजिलो भयो । त्योबाहेक निर्देशकको यो क्षेत्रमा लामो अनुभव भएकाले उहाँले सजिलै गाइड गर्नु भयोे,रोशनीले भनिन् । समस्या परेका यौनकर्मीको आवाज बनेर फिल्ममा देखिन पाउने अवसर गुमाउन नचाहेका ‘लालिमा’मा काम गरेको शीर्ष नायिका रोशनी कार्कीले बताइन् ।
उनले भनिन्, ‘समाजले यौनकर्मीहरूले मानवको दर्जासमेत दिएको छैन । यो फिल्मको प्रस्ताव आएपछि मैले उहाँहरूबाट बुझेको प्रमुख कुरा यही हो । उहाँहरू यो कर्ममा आउनुको कारण डरलाग्दो छ । उहाँहरूको आवाज बन्न म यो फिल्ममा जोडिएको हो ।’चलचित्रमा रोशनीपछि समानान्तर भूमिकामा उषा रजक रहेकी छिन् । चलचित्रमा उनले राेशनीको आमाको भूमिका निर्वाह गरेकी छिन् । विगत लामो समयदेखि निर्माण पक्षले यौनकर्मीसँग जोडिएर गरेको काम गरिरहेका कारण आफू यस फिल्ममा अनुबन्ध भएको नायिका उषा रजकले बताइन् ।
उनले भनिन्, ‘कसैको पीडालाई फिल्म बनाउने अधिकार कसैलाई छैन जस्तो मलाई लाग्छ । तर, यो टिमले २० वर्षदेखि यौनकर्मीसँग जोडिएर काम गरेको छ । उनीहरुको पीडामा साथ दिएको छ । उहाँहरूसँग तीन हजार यौनकर्मीको जोडिएर काम गरेको अनुभव छ । सोहीकारण उहाँहरूलाई यौनकर्मीको पीडाको कथा भन्ने अधिकार छ जस्तो लाग्यो । त्यही भएर म यो फिल्मको कलाकार बन्न तयार भएँ ।’
फेथ आस्थाको प्रस्तुतिमा बनेको यस फिल्ममा रोश्नी र उषासहित नायक जीवन भट्टराई, सुष्मा निरौला, घनश्याम जोशी, सबिन कट्टेल र शिशिर वाङ्देल मुख्ष भूमिकामा छन् । फागुन २९ बाट प्रदर्शनमा आउने यस फिल्मको कार्यकारी निर्माता रीना लामा हुन् । नेसनल सिने ग्रुप नेपालले यो फिल्म वितरण गर्दै छ ।
